Velotour um den Bodensee 2012

Nossa tura cul velo

 

Arrivos a St. Magethen, spettaivan già sar Fadri e sar Markus. Nus vains clappo noss velos chi d’eiran chargios in remuorchs e vains chargio las valischs i’l char. A mezdi essans partieus, tuots insembel. Nus ans vains fermos tar ün parkegi, e lo vains fat quatter gruppas. La prüma, la pü svelta es ida cun sar Fadri, la seguonda cun sar Benno, la terza cun duonna Claudia e l’ultima cun sar Christoph. Eau sun in üna gruppa perfetta. La prosma posa vains fat tar üna chesa fich speciela, üna da sar “Hundertwasser“. Ma la prüma gruppa es ida fos ed ho spetto alura tar l’Hotel “Bad Horn“. Lo vains pudieu manger ün dessert. Quel d’eira fich bun. Da lo essans ieus fin ad Arbon. Lo vains cu prüm guardo la cited e zieva vains fat üna posa tar üna plazza da giuver. Dad Arbon vaivans auncha da fer set kilometers fin a Romanshorn. La prüma etappa d’eira fich bella, choda e speciela. La sveltezza da nossa gruppa eira perfetta. Eau speresch cha que resta l’inter’eivna uschè. Ma l’intera prüm’etappa d’eira be 30 kilometers e las prosmas saron bger pü lungias, eau m’allegr. Il pü bel da noss’etappa d’eira il lej e da vzair tuot verd. Perche cha giò cò illa Bassa es tuot già verd e bel e fich chod. Bel d’eira eir cha nun es capito ünguotta e ch’üngün nu s’ho fat mel. Ramura 1. Sek. 

L’ultima etappa

Quatter dis dürs d’eiran passos. Hoz füss l’ultim di cul velo. Zieva avair mangio üna culazchun rinforzanta sül bain puril ed avair paqueto las valischs, essans tuots ieus a piglier noss velos. Las gruppas as haun tuottas missas insembel. Ma aunz cu cumanzer l’ultima etappa, daiva que üna foto da gruppa cun tuots insembel. Alura d’eira tuot pront. La gruppa ün es partida cun sar Tschumper, la gruppa duos cun duonna Claudia, la gruppa trais cun sar Conrad e la gruppa quatter cun sar Feuerstein. La gruppa da duona Claudia es partida cu prüma, zieva la gruppa da sar Conrad, alura la gruppa ün, e zieva l’ultima gruppa.

Il sulagl splenduriva già bod la bunura sün nossas fatschas. Al cumanzamaint pedalaivans cun üna sveltezza da 19 km/h. Quista etappa nu vaiva bod mê pendenzas, que voul dir cha la prubabilted da clapper vent eira pü granda. Alura ans vains miss illa tecnica da colonna, per cha tuots rivan da tegner la sveltezza. Zieva 8 kilometers vaiva la gruppa ün surpasso tuot las gruppas. Uossa vains gieu üna sveltezza da circa 23 km/h. Nus d’eirans adüna dasper il Rain. Üna vouta da la part svizra, e l’otra vouta da la vart tudas-cha. Nus essans eir passos dasper üna da las tschinch ouvras atomicas da la Svizra, a Leibstadt. In totel vains fat duos posas, perche cha nus vulaivans river al böt uschè svelt scu pussibel. Sar Tschumper ho augmanto la sveltezza ed a la fin vaivans üna media da 28 km/h. Rivo illa cited da Rheinfelden, stuvaivans alura diminuir la sveltezza, pervi dal traffic urban. Üna vouta essans dafatta gnieus straglüschos dal radar. Las 10.30 d’eirans alura rivos. Nus pensaivans, cha füssans la prüma gruppa. Ma la gruppa da sar Conrad d’eira riveda cu prüma. Ma que be perche cha sun ieus tuot il temp sülla via principela. Ed uschè vains passanto l’ultima etappa. Leonardo, 2. Sek.