Gita d’utuon Val da Camp 2012

Eau am sun sdasdeda e d’he realiso cha que do ün di da bellezzas. Nus ans vains rechattos a las 9:00 davaunt la posta. L’auto da posta es gnieu sü da la staziun e d’eira già  plain. Cun plain managi, cha tuot quels chi sun ieus aint tar la posta haun stuvieu ster in pè.
Zieva 40 minuts essans rivos a Sfazù. Cur cha tuots d’eiran insembel essans partieus. Ils mats da l’och- e nouvevla sun ieus ouravaunt e sun chaminos scu nars. Già  zieva ün per minuts nu’ls vains pü vis. Nus mattas vains piglio ün pô pü pachific, ma listess essans chaminedas ter svelt. La via püchöntsch largia ans ho mneda tres la bella val. Dapertuot vaiva que prümarans vegls fabrichos cun craps.
Zieva var ün’ura essans rivos tar la chamanna dal SAC Saoseo. Sar Keller ho auncha bavieu ün cafè, ma’ls mats e nus essans ieus inavaunt. Cur cha essans rivos tal muossavia vaivans ün batibuogl. Nos böt d’eira il Lej da Val Viola e sül muossavia staiva scrit be Lej Saoseo. Uschè haun Noemi, Franca ed eau piglio our noss handys per guarder sül GPS. Nus vains piglio l’otra via ed essans inscuntros als mats cuort aunz nos böt. Els haun strat cun se mez bös-chs, perche cha sar Keller ho dit, cha tal lej nun hegia que laina.
Nus essans rivos al lej e’l prüm pled d’eira: «Wow ! » Il lej d’eira verd s-chür ed enorm bel! Svelt vains fat ün fö e cumanzo a brasser nossas liangias. Mieu frer es gnieu bütto aint il lej fraidischem e scu chastih haun ils « noschs » mats stuvieu ir aint il lej a nuder. Eir oters haun gieu il curaschi dad ir a nuder. Sün quella pas-chüra güst al lej d’eiran duos chavallas ed ün puleder. Il puleder es adüna ieu tar Faro, il chaun da sar Feuerstein, ma quel nu vaiva uschè gust.
Zieva la posa granda da var duos uras essans partieus vers il Lej Saoseo. Lo vains auncha fat fotografias da tuot il s-chelin ot. Il Lej da Saoseo ho tuot ün’otra culur cu’l Lej da Val Viola, nempe türkis. Que d’eira simplamaing bellischem! Il temp es passo fich svelt e già  bod d’eirans darcho a Sfazù. Svelt essans auncha ieus sül secret i’l restorant e l’auto da posta es già  sto davaunt chesa. Quista vouta ho que gieu avuonda plazza e tuots haun pudieu tschanter già². Que d’eira ün di da pumpa e per me üna da las pü bellas gitas!  Valeria