Turnier d’utuon

Scu tuot ils ans, aunz las vacanzas d’utuon, partecipeschan la 6evla classa è’l s-chelin ot al turnier d’utuon. Circa 3 eivnas aunz il turnier haun ils scolars da la reela cumanzo a preparer tuot. Pü tard haune alura pendieu sü üna glista, per cha quels chi vöglian esser schefs da las gruppas as paun annunzcher. Ün pêr dis pü tard pendaiva già  la glista cullas gruppas. In tuot daiva que 13 gruppas. Il schef da la gruppa stuvaiva alura scriver sülla glista, chenün tema ch’els vöglian esser. In ün di d’eira la glista già  bod plaina.

In mia gruppa d’eiran Romeu, Diana, Jessica, Flurin ed eau. La schefa d’eira Diana. Nus vains tschernieu „Leders“ scu nos tema. Tuots d’eiran fich agitos aunz il turnier, ma al listess mumaint ans allegraivans pervi da las vacanzas.

La reela vaiva tschernieu tschêl e terra, ballapè, basket, schluppet pneumatic (Luftgewehr) e ballarait scu sports per quist turnier. Mincha squedra vaiva da giuver 2 voutas mincha gö, in tuot daiva que 10 gös. Aunz la posa sun tuots ieus as preparer illas gardarobas da la scoula. Que nu daiva bod pü üngüna plazza. Dandettamaing ho cumanzo il turnier e tuots d’eiran plain energia per quadagner quel. Güst il prüm ho mia squedra stuvieu ir a fer la foto da gruppa.

Il sulagl appariva davous las muntagnas, a paraiva da gnir ün bel di da turnier. Ils magisters d’eiran scumpartieus i’ls differents lös da gö per fer arbiter. Basket gniva giuvo illa halla granda, cul schluppet vains trat illa staunza d’urdegns da la halla granda, ballarait sülla plazza da posa, ballapè sülla plazza da ballapè e tschêl e terra aint illa halla pitschna. Zieva mincha gö daiva que üna posa da circa 5 minuts. La squedra gniva minchataunt trist u minchataunt eir cuntaint dal gö. Ün pêr gnivan eir grits culs arbiters.

A mezdi daiva que üna posa granda per manger. Que daiva „Schnitzelbrot“ cun salata e da baiver tè fraid. Que d’eira fich bun. Zieva daiva que auncha tuortas, cha divers scolars vaivan fat. Pü tard es il turnier ieu inavaunt. Que gniva chod. Al zievamezdi ho mia squedra guadagno tuot ils gös.

Il turnier giaiva a fin e tuot ils scolars güdaivan a rumir las plazzas chi gnivan druvedas per giuver. Cur cha d’eirans a fin cun rumir seguiva la premiaziun. Quels chi vaivan guadagno dapü gös d’eira la gruppa „Colours“. Ils meglders vstieus vaivan ils „Clowns“ ed in totel haun guadagno ils „Colours“. Mia squedra es riveda sülla terza plazza. Zieva que ans allegraivans tuots süllas vacanzas. Leonardo, 2. secundara